Mae offer Cymraeg i Apple Mac OS X ar gael i’w lwytho yn rhad ac am ddim yn sgil cydweithrediad rhwng Bwrdd yr Iaith Gymraeg ac Uned Technolegau Iaith Canolfan Bedwyr, Prifysgol Bangor.

Am y tro cyntaf bydd defnyddwyr Apple Mac OS X yn gallu defnyddio set gynhwysfawr o raglenni gwirio sillafu a gramadeg Cymraeg, yn ogystal â chyfres o eiriaduron Cymraeg/Saesneg. Yn yr un modd â rhaglenni cyfrifiadurol Cymraeg eraill bydd Cysgliad i Apple Mac OS X yn gweithio â’r rhan fwyaf o feddalwedd a ddefnyddir bob dydd gan ddefnyddwyr Apple Macintosh.

Cynhyrchwyd Cysgliad ar gyfer Apple Mac drwy gymorth grant gan Fwrdd yr Iaith Gymraeg. Dywedodd Meirion Prys Jones, Prif Weithredwr y Bwrdd:

“Mae hwn yn ddatblygiad allweddol i’r iaith Gymraeg, ac rydym yn arbennig o falch fod yr offeryn hwn ar gael yn rhad ac am ddim i siaradwyr Cymraeg ei ddefnyddio yn eu bywydau bob dydd, boed hynny yn y gwaith neu yn y cartref. Mae’n dilyn datblygiadau cyffrous eraill ym myd technoleg, gan gynnwys pecynnau rhyngwyneb iaith yn rhad ac am ddim i Microsoft Office a Windows.”

Dywedodd Delyth Prys, arweinydd Uned Technolegau Iaith, Canolfan Bedwyr:

“O’r blaen dim ond ar Microsoft Windows oedd Cysgliad ar gael, ond fe gawsom ni nifer o geisiadau am fersiwn a fyddai’n addas ar gyfer cyfrifiaduron Apple Mac OS X. Mae’n well gan rai dylunwyr graffeg, cyhoeddwyr a ffotograffwyr ddefnyddio Apple Mac OS X, ac mae’r ddarpariaeth o offer Cymraeg yn hanfodol iddynt wirio ansawdd eu cynnyrch Cymraeg.”

Nodiadau i Olygyddion

1. Mae Cysgliad i’r Mac ar gael ar gyfer cyfrifiaduron Apple Mac OS X, 10.4 neu hwyrach. Gellir ei lwytho yn rhad ac am ddim oddi ar http://e-gymraeg.org/cysgliadmac/
2. Mae Uned Technolegau Iaith Canolfan Bedwyr yn uned ymchwil sy'n datblygu adnoddau iaith ar gyfer y Gymraeg, yr ieithoedd Celtaidd eraill, a sefyllfaoedd amlieithog. Cafodd ei sefydlu ar ei ffurf bresennol yn 2002. Mae unigolion o fewn yr uned wedi bod yn datblygu cymwysiadau technolegau iaith ar gyfer Prifysgol Bangor ers 1993
3. Ym mis Hydref 2007, dyfarnodd Llywodraeth Cynulliad Cymru arian KEF i’r Uned Technolegau Iaith i gysylltu Canolfannau Addysg Uwch a Busnesau Bach a Chanolig yng Nghymru sy’n ymddiddori yn y cyfleoedd sy’n codi ar lefel ryngwladol a lleol o gynyddu’r defnydd o Dechnolegau Lleferydd a Iaith  
4. Mae’r datblygiad hwn yn deillio o Technoleg Gwybodaeth a’r Gymraeg: Dogfen Strategaeth, dogfen a luniodd y Bwrdd ar gais Llywodraeth Cynulliad Cymru yn y ddogfen Iaith Pawb. Mae’r Strategaeth yn nodi polisi’r Bwrdd sef y bydd yr holl offer cyfrifiadurol mae’n buddsoddi ynddynt ar gael yn rhad ac am ddim i ddefnyddwyr.