Mae plant bach yn dysgu iaith yn rhwydd. Maen nhw'n sugno iaith fel mae sbwng yn sugno dŵr.

Y ffordd orau i ddysgu Cymraeg yw dewis addysg cyfrwng Cymraeg.

Mae ysgolion Cymraeg a dwyieithog ar gael ym mhob rhan o Gymru, a chofiwch – does dim rhaid i chi siarad Cymraeg yn rhugl er mwyn i'ch plentyn fanteisio ar addysg cyfrwng Cymraeg.

Manteision di-ben-draw

Cymdeithasol

Cymysgu a chyfathrebu gyda llawer mwy o bobl a mwynhau dau ddiwylliant.

Cyrraedd y nod

Mae plant sydd yn derbyn addysg cyfrwng Cymraeg neu ddwyieithog yn gwneud cystal os nad yn well yn yr ysgol.

Dwyieithog a dawnus

Ni fydd sgiliau Saesneg eich plentyn yn dioddef ond yn parhau i ddatblygu.

Dyfodol disglair

Yng Nghymru, mae gallu siarad Cymraeg a Saesneg yn fantais fawr i bobl ifanc wrth chwilio am swyddi.

Addysg Gymraeg o'r blynyddoedd cynnar – y cychwyn gorau posib i'ch plentyn

Y Ddarpariaeth cyfrwng Cymraeg neu Ddwyieithog

Mae addysg cyfrwng Cymraeg a dwyieithog ar gael i bob plentyn yng Nghymru. Mae gan bob Awdurdod Addysg Lleol ysgolion sydd yn darparu’r math hwn o addysg. Mae’r ffaith fod rhieni’n galw am fwy eto o ddarpariaeth Gymraeg a dwyieithog yn profi mor llwyddiannus yw’r addysg sydd ar gael yn yr ysgolion hyn. Mae gan yr ysgolion hyn flynyddoedd o brofiad ac arbenigedd o ddysgu dwyieithog. Yn wir, mae Cymru ar y blaen i ran fwyaf o wledydd y byd o ran datblygu dwyieithrwydd mewn plant a phobl ifanc.

Yng Nghymru mae addysg statudol lawn amser yn dechrau'r tymor yn dilyn pen-blwydd y plentyn yn 4.
Mae addysg rhan amser statudol ar gael i bob plentyn o’r tymor yn dilyn pen-blwydd y plentyn yn 3 oed. Gall hyn fod mewn ysgol, neu gall gylch chwarae, gylch meithrin, meithrinfa ddydd neu warchodwr plant ddarparu’r addysg ran amser hwn. Gallwch gael rhagor o wybodaeth am y ddarpariaeth leol gan eich Cyngor Sir.

Yr Ysgol Gynradd

Yn ddibynnol ar ble yng Nghymru rydych chi yn byw, gall addysg cyfrwng Cymraeg neu ddwyieithog gael ei gynnig mewn gwahanol fathau o ysgolion.

• Ysgol draddodiadol Gymraeg
• Ysgol benodedig Gymraeg
• Ysgol ddwy ffrwd, lle mae’r disgyblion naill ai yn derbyn eu haddysg drwy gyfrwng y Gymraeg neu yn y Saesneg.

Mewn ysgolion neu ffrwd Gymraeg addysgir disgyblion drwy gyfrwng y Gymraeg yn unig yng Nghyfnod Allweddol 1 (tan eu bod yn 7). Yng Nghyfnod Allweddol 2 (7 tan 11 oed) mae’r Gymraeg yn parhau fel y prif gyfrwng addysgu. Addysgir Saesneg fel pwnc, yn ogystal â rhai agweddau o bynciau eraill.

Yr Ysgol Uwchradd

Os yw plentyn wedi derbyn addysg gynradd cyfrwng Cymraeg neu ddwyieithog, does dim rheswm i beidio ag astudio pynciau drwy gyfrwng y Gymraeg yn yr ysgol uwchradd.

Mae yna wahanol fathau o ysgolion uwchradd cyfrwng Cymraeg a dwyieithog.

Mewn ardaloedd mwy Cymraeg cewch ysgolion uwchradd traddodiadol Gymraeg lle gall disgyblion ddewis astudio pynciau naill ai drwy gyfrwng y Gymraeg neu’r Saesneg.

Mewn ardaloedd eraill cewch ysgolion uwchradd penodedig Cymraeg lle:

• mae mwyafrif y pynciau hyd at lefel TGAU, Uwch Gyfrannol ac Uwch yn cael eu dysgu drwy gyfrwng y Gymraeg
• gall fod dewis iaith ar gyfer Mathemateg a Gwyddoniaeth mewn rhai ysgolion.

Mae gan bob Awdurdod Addysg Lleol Gynllun Addysg Gymraeg a llawlyfr i rieni sy’n nodi manylion am y mathau o ysgolion sydd ar gael o fewn y Sir, a’r addysg maen nhw’n ei chynnig. Mae copïau ar gael gan yr Awdurdod Addysg Lleol, neu o lyfrgelloedd ac ysgolion yr ardal.

Y Gymraeg mewn Ysgolion

Yn unol â Deddf Addysg 1988 rhaid i'r Gymraeg gael ei chynnwys fel pwnc yn y Cwricwlwm Cenedlaethol.

Mae’r Gymraeg yn bwnc gorfodol i bob disgybl yng Nghymru hyd at 16 mlwydd oed.

Mewn ysgolion Cymraeg neu ddwyieithog mae’r Gymraeg yn Bwnc Craidd, fel Mathemateg, Gwyddoniaeth a Saesneg (rhwng oed 7 a 16 yn unig).

Mewn ysgolion cyfrwng Saesneg addysgir y Gymraeg fel ail iaith, Pwnc Sylfaen yw’r Gymraeg yn yr ysgolion hyn. Rhaid i ddisgyblion astudio’r Gymraeg am 11 mlynedd, o 5 i 16 mlwydd oed.

Patrwm Dysgu Cymraeg mewn Ysgolion

Mewn ysgolion cyfrwng Cymraeg a dwyieithog astudir y Gymraeg fel pwnc. Yn ogystal, astudir y pynciau eraill drwy gyfrwng y Gymraeg.

Mewn ysgolion cyfrwng Saesneg astudir y Gymraeg fel pwnc yn unig.

Am fwy o fanylion ar dwf addysg Gymraeg ac addysg drochi gweler y cyhoeddiadau ar ochr dde'r dudalen hon.