Mae Bwrdd yr Iaith Gymraeg yn gorff statudol a noddir gan Lywodraeth Cynulliad Cymru. Fe’i sefydlwyd yn Rhagfyr 1993, o dan delerau Deddf yr Iaith Gymraeg. Ei brif swyddogaeth yw hybu a hwyluso defnyddio’r iaith Gymraeg. 

Penodir aelodau'r Bwrdd gan Weinidog Treftadaeth Llywodraeth Cynulliad Cenedlaethol Cymru, ac mae ganddo staff o dros saith deg. O dan Ddeddf Llywodraeth Cymru 1998, daeth y Bwrdd yn atebol i Gynulliad Cenedlaethol Cymru, ar ôl bod yn atebol i'r Swyddfa Gymreig ac yn cael ei ariannu ganddi yn y gorffennol.

Yn syml, prif nod y Bwrdd yw ei gwneud hi’n haws i bawb ddefnyddio Cymraeg ymhob agwedd ar fywyd, i fagu hyder pobl yn eu gallu i ddefnyddio’r iaith, i annog mwy o bobl i siarad, darllen ac ysgrifennu Cymraeg mewn sefyllfaoedd newydd, ac i drosglwyddo’r iaith i’w plant.

"Prif nod y Bwrdd yw ei gwneud hi'n haws i bawb ddefnyddio Cymraeg ymhob agwedd ar fywyd." 

Rydym hefyd yn anelu at weithio mewn partneriaeth â chyrff sector cyhoeddus, busnesau preifat a mudiadau gwirfoddol, yn cynnig cyngor ac adnoddau i helpu darparwyr gwasanaethau i roi dewis iaith i’w cwsmeriaid yn naturiol.