Cymraeg Kids Soak it Up

Beth yw’r prosiect?

Mae plant bach yn dysgu iaith yn rhwydd. Maen nhw’n sugno iaith fel mae sbwng yn sugno dŵr.

Dyna neges Bwrdd yr Iaith Gymraeg trwy’r prosiect Cymraeg – Kids Soak it Up!

Mae’r prosiect wedi ei anelu at rieni newydd a darpar rieni, gan hyrwyddo gwerth dwyieithrwydd a manteision dysgu siarad Cymraeg o oedran ifanc. 

Ble a Phryd?

Bydd y prosiect yn dod i’r ardaloedd canlynol – Abertawe, Bro Morgannwg, Caerffili, Castell-nedd Port Talbot, Casnewydd, Conwy, De Powys, Gogledd Powys, Merthyr Tydfil, Mynwy, Pen-y-bont, Rhondda Cynon Taf, Sir Ddinbych, Sir y Fflint a Wrecsam -  rhwng 9 Chwefror a 6 Mawrth eleni. 

Gweithredir y prosiect gan y Fenter Iaith leol, sydd wedi trefnu nifer o weithgareddau cyffrous yn ystod mis Chwefror a Mawrth er mwyn tynnu sylw at y prosiect. Yn ystod y digwyddiadau hyn, bydd gwybodaeth ar gael am addysg Gymraeg, a ble mae’r addysg ar gael yn lleol.

Eisiau gwybod mwy?

Am fanylion pellach am weithgareddau yn eich ardal leol cysylltwch â’ch Menter Iaith leol (gweler Amserlen Digwyddiadau Cymraeg Kids Soak it Up a Cysylltiadau Defnyddiol ar ochr dde'r dudalen)

Beth yw neges prosiect Cymraeg Kids Soak it Up?

• Y ffordd orau i ddysgu Cymraeg yw dewis addysg cyfrwng Cymraeg

Mae ysgolion Cymraeg a dwyieithog ar gael ym mhob rhan o Gymru, a chofiwch – does dim rhaid i chi siarad Cymraeg yn rhugl er mwyn i'ch plentyn fanteisio ar addysg cyfrwng Cymraeg.

Manteision di-ben-draw 

• Cymdeithasol

Cymysgu a chyfathrebu gyda llawer mwy o bobl a mwynhau dau ddiwylliant.

• Cyrraedd y nod

Mae plant sydd yn derbyn addysg cyfrwng Cymraeg neu ddwyieithog yn gwneud cystal os nad yn well yn yr ysgol.

• Dwyieithog a dawnus

Ni fydd sgiliau Saesneg eich plentyn yn dioddef ond yn parhau i ddatblygu.

• Dyfodol disglair

Yng Nghymru, mae gallu siarad Cymraeg a Saesneg yn fantais fawr i bobl ifanc wrth chwilio am swyddi.

Addysg Gymraeg o'r blynyddoedd cynnar – y cychwyn gorau posib i'ch plentyn